مين سبب مبدء السلبيه الجيل السابق ام الجيل الحالي

دعوني اطرح سؤال .......من سبب مبدء انا مالي وترسيخ السلبيه فينا اليس الجيل السابق بمساعدة الحكومه اللذان نقلا للشباب العدوي؟

حاولت بأعجوبه متسألنيش ازاي بس ده اللي حصل اني ادير نقاش مع شخص كبير من الجيل السابق وسألته عن ليه احنا ساكتين ومبنطالبش بحقوقنا اللي الحكومه نهباها والحياة الضنك وتعذيب الشرطه للمواطن المصري والكلام ده المعروف اللي كلنا حفظناه
المهم لقيت الراجل وشه احمر واخضر وقالي متتكلمش في السياسه لحسن الحيطان ليها ودان وبعدين البلد دي احسن من غيرها هو في احسن من كده عيشه انا مالي ياعم البلد فيها سياسين واقتصاديين ورجال اعمال كتير ودكاترة جامعه ده شغلهم هم مش احنا انما احنا مالنا ندخل نفسنا في اللي ملناش فيه ليه
لا ومش كده بس ده حاول يكتمني ومش عايزني حتي اكمل كلامي و اقنعه ان ده حقنا مش حق اللي هو بيقول عليهم لوحدهم لان البلد بلدنا لكن هو سبقني وقالي انتو كده الشباب عايزين كل حاجه بسرعه وكسلانين البلد مليانه شغل ومفيش بطاله والحياة حلوة وانا كده كويس الحمد لله هو كده ربنا خلقنا مصريين ولازم نعيش كده مش نغيير يعني وبعدين دي ماما سوزان عملت مدارس ومستشفيات والريس ربنا يطول في عمره مفيش احسن منه داحنا من غيره كان زماننا محتلين دلوقتي من دول بره كتير متربصيلنا ,
حبيت اقولو لا مينفعش نقول اننا مالنا لان لما بتقوم حرب احنا اللي بنتدبح ,,, انما السياسين والاقتصاديين ورجال الاعمال الكبار اللي خربو بيوتنا وحوشو فلوسنا في جيوبهم اول من يفرو من البلد في اي ظروف بتحصل وبيقعدو ويعيشو في الخارج وفي الاخر بيرجعو بعد مامعظمنا يكون ادبح في الحرب عشان يبيعو اراضينا اللي موتنا عليها ودمنا منشفش علي ترابها لاعدائنا ويأكلونا سموم ويصعبو علينا حتي اننا ناكول عيش كل واحد اشترك في الحزب الوطني يأتي ليدافع ويلتمس الاعذار ويذكر الانجازات والشفافيه والايجابيات المزيفه في الحكم ويدين الشعب بالتخاذل والتكاسل ودرء عيوب النظام بشتي الطرق, الضباط و الشرطه بوجه عام لا يعاملونا بأننا مصريين بني ادمين مواطنين شرفاء مثل مانسمع في التليفزيون الحكومي علي القناة الاولي والتانيه والتالته وما نقراءة في الصحف الحكوميه كالاخبار والاهرام والجمهوريه التابعه لسياسة الضحك علي الدقون وغسل ادمغتنا الكل يعرف بدون الدخول في تفاصيل العلاقة بين الشرطه والمواطنين امتي هنحس بأنه مضحوك علينا و محرومين من الحياة الادميه لقد عمل النظام من وقت توليه الحكم الي الان علي ترسيخ مبدء السلبيه والتماس الاعذار وتحميل انفسنا الفشل والتخاذل وترسيخ تلك المبادئ في عقول الجيل السابق لعلمه بمدي تأثيرهم علي الجيل الحالي لمحاوله اقناعنا ان تصريحات وقوانين ذلك النظام شريعه سماويه لا تخطأ وليس بها عيب ولكن العيب فينا